L’actividat lingüistica ye portadora d’una llibertat, a la suya pròpia abstraccion, que deberia relacionar-se, retroactivament, a ixo que conoixem como llogica, u image, unica previsiblle. Cal que las ciéncias socials prengan ixe feit d’actividat lingüistica, ixe acto de parablla i seiga aceptau tal i como se mos presenta. Renunciar alavez a una actitud demostrativa, explicativa i, mès que mès, al nuestro caso, al comun tratamento masa estadistico de las masas.

Pero tornem al feit lingüistico, i al suyo estúdio como un acto previsiblle, u aleatório, que permite a l’autor sallir de l’universo descrito i presentar una imprevisibilidat. L’efecto social de la sociolingüistica, ben feita, seria de presentar ixes fenomenos imprevisiblles como pertinents dende un punto de vista epilingüistico, si aumenta la imprevisibilidat, aumenta l’autonomia dels actors socials de la llengua. El lingüista, pobret, deberia considerar que estas actividaz lingüisticas deberian pender d’un funcionamento autonomo, i arbitràrio, ye cllaro! en unas lleis internas, ben! i no debe cayer al priorismo de pensar que una llengua designa “algo” real, “algo” que no admite discusion.

Per contra, toda esta abstraccion debe ser mantenida teoricament, mentres no vienga a confrontar-se als feits que la lingüistica mira d’expllicar. Quiero dir que els lingüistas pueden ser divergents a la forma de describir un sistema, pero no en deixar de pensar i traballar a desencriptar el(s) sistema(s) que constituyen una llengua. El podran estudiar como un corpus de textos, como la produccion d’un habllante en particular, etc. pero no deixaran de tenir el concepto unitàrio de llengua como un feit primitivo, per ixo, s’estúdia el suyo interior, i no la cascaròta. El sociolingüista, per contra, que si quiers cols, que si quiers napos, no deixa de aturmentar-se en la question, per ixo mira de justificar, i de trobar dialectos, llenguas,… i la diversidat intrinseca dels feits lingüisticos, pero a estas parabllas nuestras, que el dan tot a mal, mos han tocau en suerte, sallidas de debaix las albardas, ixas estadisticas de llenguas de ben morir desencorraladas que tienen dada a menospreciar dialectos(sic) de 20 personas. Pa la llengua este ye un juego a perder. Pero cllaro, si no tiens res, i menos la llengua, perder 20 habllantes, no ye un res. Yo, i mès a estes dias, m’acordo de toz els que va enqüestar, i me miro els quadernos, encara per rempllir, esperant que el cuco no faiga mal.