Porto 25 anyos sentint que la solucion als problemas de la llengua que foi servir ye politica.

Sospiro.

Alento i me miro pels ventanyons del piso d’alto. Me cal reconoixer que miro de trobar la silueta de la Montanya™, com si fuese una inspiracion, com si quasi tot el que foi no el fese per ella. El cielo ye virolau, color barfolla i cerinaca, fosco como un furigacho. Ye curioso veyer ixas pllantas que va feriar fa unas semanas, con esperanza d’una primavera que mos ha salliu velera, calmunidas per la calor i las tronadas. Las fllors esfresoladas se’n van, volanderas, al traspasar la seguridad del ráfil, portadas per l’aire corruco que precede la coreografia de las rellampandingas. Pa qué no tornar, a campos traviesos, ta ixe país de palabras llímpias, d’abandadiors e amurriadors? Heva de deixar-me d’estas ideas i escribir el que dende fa un tempo me corre per la cabeça, pero ni ganas en tiengo. Mai m’ha agradau pericotiar, me deixa una múrria al cuerpo que ye de’l que menos goi me feria a este cabotarde, se m’agarra al garganchon con nyudo de doble volta.

Ye la múrria la qu’escribe, sí, corregida a cada palabra pel corrector de l’ordinador, com ixe repelon que no te quiers sacar porque sabes que te fará marca. Torno a la política i conto que uno sin atro, l’aragonés irá ben pals que toquen poder ixes quatre anyos de la nuestra democrácia(sic) . M’he feit acordanza de l’ódio de Kassovitz, i que el qu’importa ye la cayida i no l’aterrizage. Bueno, encara que sabem que l’aterrizage ye la muerte segura, la cayida, que ye este mundet al que mos movem i al que mos toca batuquiar, bellas veces se fa desagradablle de tot, quatre anyos d’un llau, quatre anyos de la otro. A esto no puedo ser imparcial, pa desgrácia mia, va fer estúdios de lingüistica i, encara que me foto de cabo quan bell mueso a la llengua, a dir verdat m’estimo millor callar-me que parlar, perque esto marca ruina, toz se’n quieren fer duenyos, i cal deixar cllaro que parlam d’una cosa que no puede tenir amo. No de ye de muy buen venir esto de reconoixer que a cada día puede estar el momento en que mos esbaratarem per terra, encara que siempre podran dir que els suyos quatre anyos van estar positivos, i no se las tendran con els que yeran antes al poder, per no reconoixer que el que piden ara no el van dar fa so que el cuatre anyos anteriors. Seguntes veigo, miram de posar alas pa esvolastriar, d’estruz, directament portadas d’Africa, d’importacion, i sin querir saber que la pega no funciona ben con la calor.  Igual només cal una colchoneta toba.

De malos ratos en toca pasar tot l’anyo, pero d’esta semana m’agradaria remarcar so que uno. La llengua no vive sin personas, i al nuestro caso, con tan pocas personas que la fan servir de casa, de la que vene de las venas de la terra, de las mans d’una madre, que me fa duelo pensar en ixes que portan medio siegllo ya, ai! mirant de fer cayer la Penya dencima dels grausinos i, en cuenta de salvar-los, chafar-los. A este caso, els de Capella no se’n joderan, pos este mal, a toz (els que querim esta llengua) en toca. Me direz, ara que parlo de l’avena lloca, que si comparam las llenguas a l’agricultura, cal que l’aragonés s’agoste pa tornar a naixer. Ya podese ser tan fácil, pero si quiers trigo, no pllantes pan. U ye que igual no queren trigo?

 

Advertisements