-Dir las cosas d’esta forma te fa més viello del que ya en yes, carnuço! Me digo en voz alta, cómo si m’hese de sentir bella persona. Pero sí, aquell dia queriva ballar. Ballar, beburruquiar una mica, i més que atra cosa, ixa confusion de sentir-te parlar devant dels nuestros cubatas aiguachius. De mirar-te als uellos, ya se’n veyerá, que no tot ye bufar i fer porrons i yo soi poco estorrull. Pa estas cosas soi ben aleman, no marcho ni a pixar sin tenir un pllan.
Pero no, aquella nit se van juntar las fllamas con el foc, i va estar un solilóquio, una aquarela bllanquinosa d’ixa Uesca tan nuestra, con un tapabocas d’Alcorazados a la pocha d’una parca, con bancos a las pllaças i fent voltas mirant de trobar un bar quan se fa de dia, un nyudo en la coda i atro més t’atrás. Tu m’habllarias de las voltas d’una Seu catedralícia gotica del norte de Fráncia, yo te racontaria que existen llenguas con pronombres duals, que Jaufre Rudel hese siu capaz de morir per veyer una vez a la Princesa de Tripoli, i te diria que las vidreras de la Seu d’Aush son en gascon i tiene més de 400 anyos. Pero no se mos va dar.
Me miro al cielo i pido un deseyo, no niego el destino, palabras volanderas, ya podese fer la frase perfecta!, i dir un llatinajo, u escribir-te todas ixas cartas que ya no podré mandar-te per haver-te perdiu els mios anyos de verdaders sentimientos, i haver-me sacau l’apelliu Montesco.
Tot me salle en pasau, i ye pura ficcion, el poeta gosa estar un fingidor, va dir un mayestro, encara espero redometas pllenant mesas infinitas, i dende el llugaron qu’habito me digo en voz alta, cómo si m’hese de sentir bella persona:
-He corriu més mon, lleyiu més del que ye necesário pa ser feliz i conoixiu més mullers de las que me mereixco, que te m’estimo més madrastra que princesa i que yes bonica como una tronada dencima de Llas.
Aquella nit de cita de no res, la nit més llarga, aquella nit, tot el que vas dir yera sincero como palabra de zorriço i vas dir que no fumavas. La verdat ye revolucionária, i se reflleixa a las tuyas llunetas.

Advertisements