ellada_blue_phoneticsYe verdat que una vez muerto ixe esprito de pensar que els padres son els reis, Nadal se torna una cosa diferent. Un tipo de Saturnália con i-phones, espumillon i sucedánios d’almendra que engarona la nuestra existéncia dende finals de novembre, que deixa el suyo reús per pllatos grans como serons hasta el mes de febrero. Manimenos, pa yo s’han tornau en dias pa fer la tipica, i esperada, volteta de visitas a familiars i amigos i que, vista dende atra perspectiva, més susegada i tranquila, m’agrada i espero con ganas, pos sirve pa desenrobinar l’amistat i balear pa poder aguantar un anyo nuevo. El que gosa dir-se un amoriador pero pifoliant una semana, entre embelecs de la esmaliciada publlicidat

El tema ye que l’atro dia, dispuesas de la cllase de griego, el profesor d’iste curso i la de l’anterior me van dir que no podevan ir ta Grécia pel coste del viage, i atencion, qu’habllo de profesors universitarios! Se me va fer un nyudo a la gola perque sé el que significa pa ellos istes dias i me va sentir un privilegiau, pos encara que fuera de casa mia tiengo la posibilidat de, con tres horas d’auto, chafar suelo pátrio. Tot ixa cercania me va fer pensar en la mia situacion personal i lingüistica. Vivo a un galce, que me permite dar-me traça en occitano, i de veces en aragonés que, manimenos, s’esllanguise en tocar el francés per cosa dels estaus nacions. Las fronteras mentals son encara fuertes, i si tienen uns médios de comunicación deçaga, més. Con ixo i con tot quan te trobas con gent a la misma situacion, a escape fas buena pacha, perque quan te sentes desparionau miras de fer colla, no cal sisquiera fer servir la misma llengua, només cal comprender la situacion a la que se hi troba l’atra persona i ye més fácil habllar-se encara que calga empllegar un tercer elemento de comunicacion. Be d’estar que per isto de rodar-le tanto l’albarda a l’aragonés tiengo la sensacion de que tot andalocio ye tronada, i bella vez confundo las llenguas con las personas que, a iste caso me vienen a man, i me s’entrefá que el griego ye ben jaque i no ye redolau de solimans i dimoniez, u ben se vale que si el ye, només pa Nadal

Advertisements